Хүн төрөлхтний нийгэм, соёл, шинжлэх ухаан, техник технологийн үсрэнгүй хөгжил, түүнийг дагаад үүссэн хүний зохисгүй хэрэглээ зэрэг олон хүчин зүйлийн нөлөөнөөс дэлхийн уур амьсгал тасралтгүй өөрчлөгдөж, цаг уурын тогтворгүй байдал ихсэн, байгалийн тэнцвэрт байдал алдагдах, хөрс, ургамал, амьтдын амьдралын таатай орчин хумигдах зэрэг дэлхий нийтийн өмнө олон асуудал тулгарсаар байна. Дэлхийн аль ч хэсэг нутаг, улсад үүсч буй экологийн тэнцвэргүй байдал, сөрөг нөлөөлөл нь тухайн улс орны хилээр хязгаарлагдах бус Нэг Дэлхий- Нэг харилцан хамаарал дунд бид амьдарч байгаа билээ. Үүний нэг илрэл нь Монголын говийн элсэн хөрсний элэгдэл, цөлжилтийн тоосонцор нь Зүүн Азийн орнууд руу нүүдэллэн “Монголын Шар шороо” –ны мананг үүсгэж байгаа юм. Иймээс говийн эко системийг зайлшгүй хамгаалах шаардлага бидэнд тулгарч байна.

Бидний зорилго

Монголын говийн зэрлэг жимсний бут буюу хармагт сондуулыг нарны энергийн насос ашиглан усалгаажуулан хамгаалан, түүнийг даган ургадаг говийн шимт ургамлын төрөл зүйл гоёо, чихэр өвс зэргийг ургуулан, эко орчныг сэргээх, хамгаалахын зэрэгцээ элсний нүүдлийг бууруулах, говийн хөрсний чийгийг нэмэгдүүлэхэд хувь нэмрээ оруулах юм.

Төслийн хөрөнгө оруулалт боссоноор Өмнөговь аймгийн Даланзадгад сумын урд голд 5 га талбайг сумын ИТХ-ын тогтоолын дагуу үзэмж сайтай хаших, нарны энергийн насос бүхий худаг гаргах, усалгаажуулалтын систем тавих, нарны энергиэр цэнэглэгддэг гэрэлтүүлэгт гудамж тохижуулах зэрэг ажлууд хийгдэх юм.

Энэхүү төсөл идэвхжих нь байгалийн нөөцөө зөв удирдан аялал жуулчлал, амралтыг хөгжүүлэх бас нэгэн ногоон гарц билээ. Уг төсөл нь хэрэгжсэнээр дээрх зорилгуудыг хангах төдийгүй хүн төрөлхтөнд чимээгүйхэн айдас төрүүлж буй дэлхийн дулаарлын эсрэг үйл ажиллагаа болох юм. Түүнчлэн дэлхий нийтээрээ хэрэгжүүлж эхлээд буй НҮБ –ын санаачилсан “Тогтвортой хөгжил 2030” Хөтөлбөр, Монгол Улсын Засгийн Газрын Байгаль хамгаалах бодлого, Хүн амыг эрүүл хүнсээр хангах талаарх бодлогууд биелэгдэхэд чиглэгдсэн болно.

Та энэхүү төсөлд өөрийнхөө хувь нэмрийг өчүүхэн гэлгүй оруулах нь эх дэлхийгээ аврах дулаарлын эсрэг үйл ажиллагаанд үнэтэй хувь нэмэр оруулж байна.